«Ұстаздарға мың алғыс!»

2024 жылдың 3 қазан күні 10 сынып жетекшілерінің ұйымдастыруымен «Ұстаздарға мың алғыс!» тақырыбында ардагер ұстаздармен кездесу өткізіп, мұғалімдер күніне орай құрмет көрсеттік. Мақсаты: Мектеп тарихымен, зейнеткер ұстаздардың еңбектерімен таныстыра отырып, олар туралы мол мағлұмат беру. Оқушыларды ұстазды құрметтеуге, сыйлауға үйрету. Ұстаз мамандығының қырымен сырларын түсіндіру, ұстаз еңбегін әрқашан бағалай білуге тәрбиелеу.Мектебіміздің жиырмадан астам ардагер ұстазын мерейлі мерекелерімен құттықтадық.
Ұстаздар мектеп өмірін сағынып қалғандары соншалық, бір-бірімен, әріптестерімен, сүйікті оқушыларымен қуана қауышты. Білім беру саласында аянбай еңбек еткен сала ардагерлеріне төрден орын ұсынылып, мектебіміздің директоры Асель Садыкова ардагер ұстаздарды құрмет грамотасымен марапаттады. Тағылымды ұстаздар тәрбиесі мен ұлағат тұнығынан сусындаған сан буын шәкірттер, ізгі пейілді достар мен жора-жолдастар, әріптестер мен замандастар бас қосып, қадірлі ұстаздарға сый-құрмет көрсетілді. Бір-бірімен замандас, әріптес болған ардагерлер өткен шақтарын еске алып, кейінгі жас ұстаздарға өздерінің еңбек жолдарынан үлгі боларлықтай естеліктер, тілектер айтып, бір жасап қалды. Әріптестер әзілі, игі жақсылардың жарасымды әңгімесі әрі қарай өрбіп, ақ пейіл мен толассыз лебіз тербелген керемет күй орнады.
Жауаптылар: ДТІЖО Т.Букейбаева А.Нурахметова, 10-сынып жетекшілері Кәсіподақ ұйымы